- شوفي يا بنتي ..
- ايوة يا بابا
- الشاب كويس .. دكتور وبيحضر ماجستير .. وحالته المادية ماشاء الله واخلاق عالية ومهذب اوي لا عمره كلم بنت ولا عمره مشي مع بنت ... وسنه مناسب لسنك عنده 26 يعني اكبر منك بـ3 سنين ... قلتي ايه ؟
- .....
- اقوله ييجي بكرة ؟؟
- اللي تشوفه يا بابا
( هييييييييه هتجوز )
ـــــــــــــــــــــــــ
- انتي هتخرجي للعريس كده ؟
- ماله كده يا ماما ...
- حطي حاجة على وشك ... شوية كحل شوية روج !
- حطيت يا ماما بس مش كتير .. يقول عليه ايه ما صدقت !
- طب يلا ادخلي ..
( مش قادرة .. وقفت على باب الصالون ... مش قادرة بجد .. موقف وحش اوي )
اختي : ادخلي بقى
( ايد زقتني من ورا لقيت نفسي دخلت الصالون غصب عني .. اضطريت اكمل بقى ...)
وانا داخلة : السلام عليكم ...
العريس وقف : وعليكم السلام ورحمة الله ... بسم الله ماشاء الله
وعمالة اقرب .. هو ده ! .. وحش اوي
هو كده واقف كله ؟ كامل يعني ؟ ... قصير اوي ...
هو اقرع ولا بيتهيألي ...
قربت اكتر ........... آه اقرع وبالثلث ..
ايه اللي هو لابسه ده .. كرافتة كاروهات .. قميص كاروهات .. بدلة مقلمة ... جتنا نيلة في حظنا الهباب
اعقلي يا بت يا مخبوطة .. الراجل مش بشكله ولا لبسه .. الراجل بأخلاقه .. يلا معلش ... بكره اعلمه ازاي يلبس .. بس قرعته دي اعمل فيها ايه ؟؟ يلا مش مهم المهم يكون طيب
قعدت على الكرسي بعد ما خيبة الأمل تغلغلت جوايا ...
العريس : ازيك يا انسة مخبوطة ؟
انا بصوت مبحوح من كتر الاحراج : الحمدلله
العريس : ايه مالك زعلانة ليه ؟
( هو باين عليا اوي كده ! )
بابا : اصلها كانت تعبانة النهاردة شوية ... ها ها ها
( انا كنت تعبانة ؟ امتى ده )
بابا شاورلي من ورا العريس عشان ابتسم وافك التكشيرة
بعد السلام والتحية وشوية المجاملات ...
العريس : قوليلي يا آنسة مخبوطة .. حضرتك ليه اخترتي كلية الاقتصاد والعلوم السياسية ؟
- انا كنت اتمنى ادخل صيدلة بس مجموعي في الثانوية العامة كان ....
بابا قاطعني : احم .. هي اختارت الكلية دي عشان كانت شايفة انها مناسبة لشخصيتها اكتر ...
العريس : برضو مافهمتش انتي اخترتيها ليه يعني ؟
مخبوطة : .... عشان .. شفت انها ملائمة ليا
العريس بيتساءل بحيرة : .......... يعني اخترتيها ليه ؟
( ماله ده ! ... سلامة الفهم ! )
بابا : ... آآآآ .... على فكرة يا دكتور .. مخبوطة بترسم ...
العريس : اووووه بجد ! طب يا ريت نشوف شوية من رسوماتك يا آنسة مخبوطة ...
مخبوطة : طب عن اذنكوا .. ثواني ..
مشيت وعيون العريس عمالة تخبط فيا زي الرصاص الثاقب
جبت الرسومات بتاعتي واديتهم للعريس .. راح مسكهم من غير ما يبص فيهم وحطهم جمبه على التربيزة ...
( ايه قلة الذوق دي .. مش عايز تشوفهم اومال قومتني اجيبهم ليه .. آآآآآآآآه ... ده كان عايز يتفرج على جمال خطوتي بقى)
العريس : صحيح كنتي بتدرسي ازاي وسط القصف واللي بيحصل ده ..
انا وصوتي بيطلع مني بالعافية : والله حاولت اتأقلم عشان ..
قام مقاطعني ومدور وشه لبابا : شارون ده بجد ياعمي لا يمكن يكون معاه مفاوضات ...
( ايه يا ابني انت مش قاعدة بكلمك ! )
بعد شوية ...
العريس : عايز اسألك سؤال يا آنسة مخبوطة بس محرج شوية ..
بابا : اتفضل يا ابني خد راحتك ...
العريس : هو انتي لما كنتي في الجامعة .. كنتي بتخرجي القصة بتاعتك برا الايشارب زي ما البنات بيعملوا ؟
رديت وانا مذهولة من روعة الشخصية التي أمامي : هاه ؟ .... لا
( ده ايه الوقعة الهبلة دي )
بابا : ... ( من الصدمة مقدرش ينطق )
العريس : طب كنتي بتقعدي مع شبان ؟
انا : .......... ( ده انت زودتها اوي )
بابا : يا ابني احنا بناتنا مش بتوع الكلام ده ! انت هتزعلني منك ولا ايه ؟
العريس : انا آسف يا عمي والله مش قصدي اللي فهمته ارجوك ما تكونش زعلت مني ...
بابا : هففففففف ... خلاص حصل خير
العريس : معلش هتعبك معايا ممكن بس مناديل كلينكس اذا تكرمتي ..
انا : ثواني ...
و لسوء الحظ ( او يمكن لحسن الحظ ) كان عندنا قبلها بيوم عزومة وكل الكلينكس اللي عندنا خلص بدور مالقيتش .. لقيت في اوضتي علبة كلينكس حجم كبير .. بس مافيهاش الا 3 ورقات في آخرها ... اعمل ايه ! ..
اختي قالتلي خديهم في ايدك واديهم له ..عيب تاخدي العلبة الكبيرة دي وهي فاضية كده ... رحت طويتهم في ايدي كده زي الشطار ورحت للعريس مديتله ايدي :
- اتفضل ..
بصلي من فوق لتحت وقال :
- لا متشكر .. معايا
( لا لا لا .. انت الظاهر كده مجنون ولا مش طبيعي ... هو الواد ده ماله كده ؟ )
بعد ما احرجني وكسفني قعدت و بصيت لبابا لقيت وشه احمر وكاتم غيظه بالعافية .....
العريس بمنتهى الحداقة : ما سألتينيش يعني يا آنسة مخبوطة ... خليتك تيجيبي الكلينكس ليه مع ان معايا كلينكس
( يا واد يا فتك !!!!! )
مخبوطة : اصل انا عندي ذوق وما بحبش احرج حد
بابا : ايه يا ابني مالك ؟ ليه كده ؟
العريس : مش قصدي حاجة يا عمي بس كان قصدي اوجهها واقولها غلط الطريقة اللي قدمتلي فيها الكلينكس دي !
انا : .... ( مجنون ده ولا ايه ؟ )
بابا : خشي انتي جوة يا مخبوطة
ماكدبتش خبر وجريت على اوضتي
اختي : هاه ايه الاخبار ..
انا : لا مستحيل اتجوزه ... انا عمري ما شفت حد قليل ذوق بالشكل ده ! ... ايه ده ...
اختي : يعني خلاص ! .... جت الحزينة تفرح !
انا : لقت واحد عفش في المطرح
بعد شوية جه بابا : الراجل روح .. ايه رأيك فيه ؟ هو غبي بس يعني لو ...
انا : لا يا بابا انا مش موافقة ... ده عديم ذوق لا يمكن ...
بابا : طب اصبري انا كلمته وفهمته ان ده غلط واعتذر لأنه كان مرتبك وقعد ساعة يتأسف ...
انا : لا .... دي حركات مقصودة ...
بابا : عموما .. هو قال هيتصل بعدين .. وانتي حرة
انا : لا مستحيــــــــــــــــــــــــــــــــــــل
( فوق ما هو وحش كمان قليل ذوق وفهم ده ايه المرض ده )
ـــــــــــــــــــــــــ
ترررن ترررن
- آلو .. أهلا يا ابني مساء النور ... اه الحمدلله ... آه .. ممممم
انت شاب محترم يا ابني وكل حاجة بس .. البنت مش موافقة .... مصممة ايوة ..... ايوة ممكن تكلمها .... يا مخبوطة ... مخبووووطة .... تعالي الدكتور عايز يتكلم معاكي ... ( اداني بابا السماعة وهو بيشاورلي اخلص بسرعة )
- آلو .. مساء النور
- ايه يا آنسة مخبوطة زعلانة ليه
- مش زعلانة .. بس كل شيئ قسمة ونصيب
- وليه قررتي بالسرعة دي ان مفيش نصيب ؟
( يادي الاحراج ! اقوله قررت لأني اكتشفت انه غبي ؟! )
- اصل بصراحة حسيت ان مفيش بينا تقارب او تفاهم و ...
- ليه مفيش بينا تقارب .. هو انا بصلي الصبح ركعتين وانتي بتصليه خمس ركعات !
- ايه دخل الصلاة في الموضوع ! كل المسلمين بيصلوا زي بعض !
- يبقى مفيش اختلاف في الأمور الجوهرية .. انا مسلم وانتي مسلمة
- يا سلام ! ... شوف يا دكتور بصراحة انا آسفة اوي و
- شوفي يا آنسة مخبوطة .. انا لما كنت بدرس كنت بحفظ العملية الجراحية من اول مرة يعملها الجراح قدامي .. وكنت بحب اوضة العمليات اوي .. لدرجة اني كنت ببات فيها .. ومرة واحدة ست كانت بتولد قيصري و ...
- حضرتك بتقولي الكلام ده ليه دلوقت دخله ايه في موضوعنا ؟
- اصل انتي شايفة ان مفيش بينا تقارب في الشخصية عشان انا دارس طب وانتي اقتصاد بس احب اقولك بالعكس ده شيئ تكميلي مش محل خلاف و ...
- حضرتك ايه دخل الدراسة انا مش قصدي كده !
- اومال ايه ؟
( اقوله ايه ده )
- انا فكرت كويس وخدت قراري وكل شيئ قسمة ونصيب
- ازاي يعني قررتي .. اذا كنت انا موافق وابوكي وامك موافقين يعني احنا كده تلاتة موافقين يعني الاغلبية
- ( اغلبية ايه هي انتخابات ؟ ) ... انا اللي هتجوز مش بابا ولا ماما ...
- وانا !
- انت انسان محترم وكل حاجة بس الجواز قسمة و نصيب .. ممكن بعد اذنك عشان عايزة انام ؟
- آنسة مخبوطة ممكن اسألك بصراحة ...
( اللهم طولك يا روح )
- اتفضل اسأل ..
- انتي بتحبي حد تاني مش كده ؟
- تصبح على خير ...
وطراااااااااااااااااخ قفلت مخبوطة سماعة التليفون في وش العريس الشرير ...
ـــــــــــــــــــــــــ
تابعونا مع مغامرة جديدة وعريس جديد
=========================================
( مغامرة 2)
- شوفي يا بنتي ..
- ايوة يا بابا
- الشاب ممتاز جدا انا سألت عليه وكل الناس شكرت فيه .. دكتور اسنان بيحضر ماجستير في امراض اللثة .. وحالته المادية ماشاء الله ... بيشتغل في مؤسسة للأسنان ده غير العيادة بتاعته .. وعنده 30 سنة يعني اكبر منك بـ 5 سنين ... ايه رأيك ؟
- ....
- اقوله ييجي بكرة ؟
- اللي تشوفه يا بابا
( هييييييييه هتجوز )
ـــــــــــــــــــــــــ
- انتي هتخرجي للعريس كده ؟ وبعدين معاكي ؟
- ماله كده يا ماما ...
- حطي حاجة على وشك ... مش كل يوم هيجي عريس كويس كده !
- حطيت يا ماما .. عايزاني ابقى اراجوز عشان اعجبه !
- طب يلا ادخلي ..
( مش قادرة .. وقفت على باب الصالون . يارب المرة دي تكون اخر مرة اشوف فيها الموقف الوحش ده )
اخويا : ادخلي يا بنتي يلا ..
- انت شفته ؟
- ايوة .. راجل ماشاء الله مالي مركزه
- بجد ؟
- لا مش بجد هو شبه الزبالين .. يابت بطلي عبط وادخلي ده لو عجبتيه احمدي ربنا
وانا داخلة : السلام عليكم ...
العريس وقف : وعليكم السلام ورحمة الله ... بسم الله ماشاء الله
وعمالة اقرب .. هو ده ! .. هو مش حلو اوي .. بس شكله احسن من الدكتور العبيط اللي كان قبله بكتير ... ولابس كويس .. يلا المهم يكون بيفهم وعقله مش فاضي ..
العريس : ايه يا آنسة مخبوطة من مزعلك ؟
( هو في ايه انتوا كلكوا كده ! )
بابا : اصلها كانت تعبانة النهاردة شوية ... ها ها ها
( ايه يا بابا ده ! انت كل مرة كده ! )
العريس : لا سلامتك ألف سلامة
انا بصوت مبحوح من الكسوف : .. الله يسلمك
العريس : باباكي قالي انك ناوية تكملي ماجستير صحيح ؟
انا : ان شاء الله ربنا يسهل
بابا : مخبوطة بنت طموحة ...
العريس : ماشاء الله والله يا آنسة مخبوطة انا اعجبت بحضرتك من قبل ما اشوفك .. انا احترم الفتاة اللي بتهتم انها تكمل تعليمها وانا هشجعك ان شاء الله للنهاية
( بابا تنفس الصعداء حس اني عجبت العريس )
انا والكلام بيطلع بالعافية : ... ربنا يخليك
( الواد ده شكله بيفهم مش زي اللي قبله )
العريس : آنسة مخبوطة ... ممكن اسأل سؤال ؟
( ربنا يستر )
انا : ايوة اتفضل
العريس : انتي ليه درستي اقتصاد وعلوم سياسية مش شايفة انه مجال ينفع للرجالة اكتر ؟
انا : لا شايفة انه ينفع للكل ...
العريس : طب اخترتيها ليه طموحك تبقي وزيرة مثلا ؟
( احنا هنبتدي في الهبل ولا ايه )
انا : لا طبعا مش شرط بس ... يعني ... اصل ...
بابا : .. أأأأ .... هي درستها لأنها كلية مهمة وبتدي الطالب ثقافة عالية وبعدين يا سيدي انت بعد كده حر عايزها تبقى وزيرة عايزها تقعد في البيت ده شيئ يخصك .. ها ها ها
العريس : هاهاها ياعمي مش قصدي والله بس انا يعني حبيت اعرف طبيعتها لتكون بتحب السياسة والمشاكل وكده يعني ...
انا : ....... ( هو احنا مش هنخلص من الهبل دول ولا ايه )
بابا : لا يا ابني .. بنتي ما بتمارسش اي نشاط هي بتدرس بس
العريس : ماشاء الله يا عمي ربنا يبارك فيكو ... آنسة مخبوطة ممكن سؤال ؟
( هااه ... اتحفني ... )
انا : ايوة اتفضل ...
العريس : انتي موافقة ؟
انا : على ايه ؟
العريس : عليه !
( من اولها كده ... ! )
بابا : ان شاء الله خير يا ابني انت قلقان ولا ايه ؟ ها ها ها
العريس : والله يا عمي ما هيجيلي نوم الا لما اعرف رأيها ... اذا سمحتلي يعني ...
بابا : مبدئيا يا مخبوطة ايه رأيك في الموضوع ؟
( ده ايه المواقف الساقعة اللي بتحط فيها دي ... هو انا اعرفك يا راجل انت عشان اقول رأيي من دلوقتي ! .. طب اقولهم ايه ! )
انا : ... مبدئيا ... يعني ... ان شاء الله خير
العريس : يعني موافقة ؟
بابا : ......... قولي ما تتكسفيش ... اتكلمي عادي ..
( ايه يا بابا خايف على العريس اللقطة ليطير اوي كده )
انا : ان شاء الله ..
العريس : الحمدلله ...
بابا : اخيرا وافقتي ! ... اخيرا .. ده انتي طلعتي عيني
( ايه يا بابا مش قدام الراجل .. )
بابا : مخبوطة روحي قولي لماما تعملنا قهوة ...
( وغمزلي ... بيزحلقني من الآخر )
جريت على اوضتي ..
اختي : هاه ايه الأخبار ؟
انا : والله مش عارفة ... محتارة شوية
اختي : يا ستي وافقي وخلاص ...
انا : مش عارفة هو اهبل شوية ولا انا بتهيألي ؟
اختي : بصي العريس في اول قعدة بيكون مرتبك ويعك في الكلام انتي لازم تعذريه ... وصدقيني الرجالة دول مش هتلاقي فيهم الكامل اوي يعني ... الا ما يطلع فيه علة ... بس عموما لازم الحياة تمشي ... كلنا بنشتكي من جوازنا اهه مين مرتاح !
انا : على رأيك
بعد شوية جه بابا : الراجل روح .. ايه رأيك فيه ؟ بقولك ايه ... ما تطلعليش القطط الفطسانة فيه.. الراجل كويس واحسن من اللي كل اللي قبله ... احمدي ربنا بقى ومش عايز كلام كتير ... قلتي ايه ؟
مخبوطة : اللي تشوفه يا بابا ...
وقرينا الفاتحة ..
لولولولولولولولولولوي
ـــــــــــــــــــــــــ
طبعا راحت مخبوطة العبيطة تحكي لصاحباتها انها اتخطبت والكل جاي يبارك وعنيهم بتطق شرار من الغيظ
صاحبتي : ايوة يا عم مين قدك .. هتعملي ايه يا مخبوطة في كل المهر ده ! ...
( بتقروا علينا ولا ايه )
انا : مش لما نكتب الكتاب واخد المهر الأول
- : يا ستي ادينا بندردش ...
-: مش عارفة بفكر اشتري عربية .. ايه رأيك ؟
- : فكرة هايلة ... والدهب جيبيه كله من داماس .. اعرف وحدة خياطة يا مخبوطة تهبل ... وكوافير شاطرة اوي .. بس يرجع خطيبك من السفر انا هعملك كل حاجة ... نفسي اشوف شكله اوي .. على فكرة انا شفت امبارح دكتور سألني عنك
- : مين ده معرفوش
- : انما ايه زي القمر .. قلت يا خسارة لو كنا عرفناك قبل ما مخبوطة تتخطب ... يمكن كنت انت من نصيبها .. انا متأكدة انه احلى من خطيبك ... خسارة اصله امور اوي
- : ...... انا عارفة بقى كل شيئ قسمة ونصيب
ـــــــــــــــــــــــــ
خطيبي : آلو .. ايوة يا مخبوطة ازيك ..
انا : هترجع امتى كل مرة تقولي بعد اسبوع وبعدين تأجل ..
- : معلش بقى ظروف .. عايزة حاجة اجيبهالك معايا ؟
- : لا سلامتك .. المهم ترجع بالسلامة
( انا قلبي مش متطمن وحاسة كده ان مفيش حاجة هتحصل )
بابا : خطيبك ماقالش راجع امتى ؟
انا : لا يا بابا ..
تررررن تررررن
خطيبي : ايوة يا مخبوطة ... انا عندي مشكلة
انا : مشكلة ايه ؟
- : ماما ...
-: مالها ؟
- : عايزاني اخطب بنت خالتي .. وبصراحة مش مخلياني اسافر عشان اتمم الموضوع ..
- : يا سلام ! .. تخطبها وانت خاطبني ازاي يعني .. مامتك ماقالتش الكلام ده من الأول ليه ؟
- : مخبوطة هي مش عايزة تجوزني من غير ما تشوف العروسة ..
-: طب اعمل ايه اسافر لها يعني ؟
- : انتي عارفة مخ الستات الكبار ... عايزة تشوفك كويس لأنها شايفة ان الصور مش كفاية .. مستعد ادفعلك تمن التذكرة بس تعالي ..
-: لا طبعا مش جاية .. هو انا فرجة ! ...
- : انا مش عارف اعمل ايه
- : براحتك ... عايز تخطب بنت خالتك انت حر
- : لا مش عايز والا كنت خطبتها من الأول .. بس ماما ..
-: لو مش قادر تقرر سيب ماما هي اللي تقرر ..
وطرااااااااااخ قفلت مخبوطة السماعة في وش خطيبها اللي ماعندوش شخصية
اتصل خطيبها في أبوها وحاول يقنعه يخلي مخبوطة تسافر عشان مامته تتفرج عليها وتقرر اذا يتجوزها ولا لا ... ابوها مارضيش
وقال
فرررررررركشششششش
ـــــــــــــــــــــــــ
صاحبتي : بجد !... فسختوا الخطوبة ؟!
( هي مالها فرحانة كده ليه ! )
انا : ايوة فسختها ..
- : انتي زعلانة ليه مش انتي ماكنتيش بتحبيه ؟
- : ايوة بس يعني الموقف مش حلو ..
- : انتي لسة صغيرة وبكرة ييجي اللي احسن منه .. فاكرة الدكتور الامور اللي قلتلك عليه ؟
- : ماله ؟
-: مش طلع خاطب !!!!
انا :
عشان تحرمي مرة تانية يا مخبوطة تحكي لصاحباتك عن خصوصياتك
ـــــــــــــــــــــــــ
تابعونا مع مغامرة جديدة وعريس جديد
=======================================
( مغامرة 3 )
- شوفي يا بنتي ..
- ايوة يا بابا
- الشاب كويس .. تاجر ناجح ومقتدر مادياً جداً .. سألت صحابه عنه قالولي عنه كلام طيب وكويس ... وعنده 30 سنة يعني اكبر منك بخمس سنين .. سبحان الله اهه ربنا بعته بعد فسخ خطوبتك على طول شفتي ربنا كريم ازاي
- ودرس ايه ؟
- هو لسة مسجل في الجامعة انتساب وبيدرس لغة عربية ..
- ايه يا بابا يعني مفيش معاه شهادة جامعة على الأقل ... ده انا بحضر ماجستير وكنت مخطوبة لدكتور !
- بقولك ايه الراجل محترم وده اهم حاجة .. ومقتدر مادياً مش هيحوجك لحد .. وشهادة الجامعة اهو بيدرس يعني عنده طموح وهياخدها في الآخر .. سيبك من كلام الناس ......... هااااه قلتي ايه ؟؟؟
- .....
- اقوله ييجي بكرة ؟؟
- اللي تشوفه يا بابا
( هييييييييه هتجوز )
ـــــــــــــــــــــــــ
- انتي هتخرجي للعريس كده ؟
- ايوة يا ماما
- طيب براحتك .. يلا ادخلي ..
( دخلت الصالون بدون تردد .. اصل خلاص الموقف بقى عادي زي شربة المية )
وانا داخلة : السلام عليكم ...
العريس وقف : وعليكم السلام ورحمة الله ... بسم الله ماشاء الله
وعمالة اقرب .. هو ده ! ... يااااااااااه كل ده طول .. هيخبط في السقف ! .. ومال نص شعره ابيض كده ! .. مش قالوا عنده 30 !
اعقلي يا بت يا مخبوطة .. الراجل مش بطوله ولا شعره .. الراجل بأخلاقه .. المهم يكون طيب
العريس : ازيك يا انسة مخبوطة ؟
انا بدون اي كسوف او احراج : الحمدلله
العريس : ايه مالك زعلانة ليه ؟
( وبعدين بقى )
بابا : اصلها كانت تعبانة النهاردة شوية ... ها ها ها
( بجد يا بابا .... لا تعليق !!!! )
العريس : قوليلي يا آنسة مخبوطة .. انتي بتعملي ايه دلوقتي ؟
- في الدبلومة
- يعني خلصتي جامعة مش كده ؟
- .... هه .. ايوة خلصت .. ماهي الدبلومة للماجستير
- هاهاها .. اصلي بصراحة معرفش في الحاجات دي ماليش فيها
انا : .....
بابا : ... أأأأأ ... اخبار شغلك ايه كلمنا عنه شوية ؟
- والله يا عمي انا خلصت تشطيب في مكتب العربيات بتاعي .. وحالياً دخلت من الجمرك 10 عربيات .. كلفوني كتير ..
وابتسم وبصلي : وان شاء الله وحدة منهم هدية للآنسة مخبوطة
( متشكرين يا خويا )
بابا : كلك ذوق يا ابني احنا يهمنا الراجل مش العربيات ..
العريس : ده أقل حاجة ممكن اقدمها للآنسة مخبوطة يا عمي .. صحيح يا آنسة مخبوطة نوع موبايلك ايه ؟
انا : نوكيا 7250 ( اياميها )
العريس : لا لا لا .. ان شاء الله هجيبلك واحد محدش مسكه قبلك .. جبت لأختي واحد بألف دولار ..
( مش لما نتخطب الأول ده ايه المصيبة دي .. هي المشكلة في الموبايل دلوقتي )
العريس : عارفة يا آنسة مخبوطة اختي دي فرحها كلفني 30 ألف دولار ... عقبالنا ان شاء الله
( بابا تنفس الصعداء حس اني عجبت العريس )
بابا : يا ابني مش مهم كل الكلام ده المهم الاحترام والمعاملة بما يرضي الله
العريس : طبعا طبعا يا عمي ربنا ما يجيب حاجة وحشة
بابا : قومي يا مخبوطة قولي لماما تعملنا قهوة ( وغمزلي )
وجريت على اوضتي .... وهاتك يا عياط
ماما : ايه مالك ؟
انا : يا ماما ده ما بيفهمش حاجة غير في الفلوس ..
ماما : ..... وبعدين هنفضل كده ؟
انا : معرفش انا مش قابلاه وشكلنا كده مش نافعين لبعض
بعد شوية جه بابا : الراجل روح .. ايه رأيك فيه ؟
انا : يا بابا ده طول القعدة يتمنظر عليه بفلوسه ...
بابا : انتي عايزة تعنسي ؟ لو عايزة تعنسي قولي ؟
انا : لا مش عايزة اعنس .. بس برضو مش عايزة اتجوز ده ..
بابا : الراجل كويس وقلنالك هيكمل تعليمه .. هو صحيح طويل اوي .. بس الطول للراجل زينة !
( الطول زينة اه بس مش للدرجة دي 220 سم ... اكلمه ازاي ؟ رقبتي هتوجعني اوي وانا رافعة دماغي عشان ابص عليه )
بابا : يا بنتي اختك الكبيرة اتجوزت دكتور .. وكان فقير شفتي تعبت معاه قد ايه وكنا نساعدها ازاي ؟ ... الراجل اللي مقتدر هيريحك في حياتك .. والتعليم مسيره ياخده انتي زعلانة ليه ؟ ولو انتي شاطره شجعيه على المزاكرة
انا كان نفسي تتخطبي قوام بعد ما خطوبتك اتفسخت ... وربنا حققلنا امنيتنا
انا : ...... طيب زي ما انتوا عايزين
وقرينا الفاتحة ..
مش لولولولولولولولولولوي
ـــــــــــــــــــــــــ
وفضلت مخبوطة كل يوم تصلي استخارة وتعيط نفسها تفركش الخطوبة مخنوقة منها اوي ... لو فركشتها اهلها هيزعلوا ويقولوا عليها بتدلع ... طب تعمل ايه ؟
ماما : مخبوطة .. يا مخبوووطة ... خطيبك قاعد في الصالون البسي وروحي اقعدي معاه شوية
مع لوية بوز : ... طيب
انا : السلام عليكم .. ازيك ؟
خطيبي : اهلا اهلا ... ازيك يا مخبوطة ايه بتعملي ايه ؟
- والله عندي بحث وكنت بزاكر .. منتا عارف الامتحانات قربت
خطيبي مع تكشيرة : آه .. يا ستي .. ربنا يوفقك ..
- وانت اخبار مزاكرتك ايه ؟
- مزاكرة ايه ؟ ... آه آه .. يا شيخة بلا مزاكرة بلا بتاع يعني هعمل بالشهادة ايه منا الحمدلله مش محتاجها
( انا الفار بيلعب في عبي )
- هو يعني ما بيتعلمش الا الفقرا عشان يشتغلوا بشهاداتهم ؟!
- التعليم ده للناس الخايبة ... المتعلمين بيتمنوا اشغلهم عندي
( دي عقد نفسية بقى )
- يا سلام ! .. انت مش ناوي تكمل ولا ايه ؟
- ومين قالك اني ابتديت اصلا .. انا سجلت كدة بس عايز الشهادة ديكور .. بس ما اعتقدش هكمل .. انا ما بحبش القراية بتخنق منها .. المهم .. شوفي جبتلك ايه .. ايه رأيك ؟
- حلوة تسلم ايديك
- عارفة قزازة الريحة دي تمنها 100 دولار ..
- ... ميرسي
- وشوية الماكياج دول كلفوني يجي 150 دولار .. طبعا الغالي للغالي
( انت كل حاجة تجيبها هتقولي تمنها ! .. بتعايرني ولا ايه )
- ... قلنا ميرسي
ـــــــــــــــــــــــــ
انا : بقولك ايه انت لازم تخلصني من الراجل ده بأي شكل
اخويا : طب اعمل ايه ! ..
انا : مش عارفة انا نفسيتي تعبانة وامتحاناتي قربت ومش عارفة ازاكر ..
اخويا : بصي ما تفكريش في اي حاجة غير مزاكرتك .. واوعدك مش هتكملي مع الراجل ده .. بس لازم تعرفي يا مخبوطة ان مفيش حد كامل ...
- عارفة .. بس مش ده ... مش ده ... مش ده
ـــــــــــــــــــــــــ
وراح اخو مخبوطة لخطيبها
- شوف عايزك في كلام رجالة .. بصراحة البنت وافقت عشان ما تزعلش بابا .. وهي مش عايزة تتجوز ... هاه قلت ايه ؟
- لا مش ممكن
- معلش حاول تفركش انت من عندك عشان هي مش عارفة تفركش ..
- طب مش هفركش
- ذنبك على جمبك بقى ...
ـــــــــــــــــــــــــ
مخبوطة عمالة تعيط وامتحاناتها بعد عشرين يوم
و فضل اخو مخبوطة وجوز اختها يقنعوا في ابوها ان الراجل ده مش هيكمل تعليمه وانه مش مريح خالص وما ينفعش
بابا - شوفي يا مخبوطة ... الراجل ده شكله كده مش ناوي يكمل تعليمه .. لو انتي مش عايزاه نفركش .. بصراحة انا واخوكي وجوز اختك كمان بعد ما اتعاملنا معاه ما ارتحنالوش .. نفكرش ؟
- فركش يا بابا فركش .. هيييييييييييييييه
وتخلصت مخبوطة من خطيبها المعقد بعد ما رجعتله كل هداياه الثمينة زي ماهي بالتكت بتاع السعر اللي عليها .. وزاكرت مخبوطة ونجحت وجابت تقدير ... هييييييييييييه مخبوطة بقت فرحانة
==========================================
.
الخميس 21 يناير 2010 - 10:33
