كلام العيون عاقل! أم مجنون؟

من العيون يا سـلام سلـم شـوف و اتعلـم
تحـت البراقـع تتكلـم و الدنـيـا نـهـار

عيون تقوللـك قصـدك إيـه بتبحلـق ليـه
ما لكش شغل تعس عليه يا راجل يـا حمـار

و عيون تقوللك أنا عارفاك و النبي ما انساك
من يوم ما شفتك م الشباك يا جدع يا صغـار

و عيون تقوللك روح يا رزيل يا بو دم تقيـل
ياباي كبه في المخاليل يـا مـا همـا كتـار

و عيون تقوللك أنا حبيت يالـلا بنـا البيـت
و عيون تقول انشالله ما جيت أنا رايحة الزار

و عيون تقوللك بالمحسوس أنا عايزة فلوس
و انشالله حتى تحوس و تدوس أنا عاملاه كار

و عيون تقوللك إمشـي يـا واد أنـا أم ولاد
و عيون تقوللك عندي معاد و يـا السمسـار

و عيون بسر الحب تبـوح كـدا بالمفتـوح
و تعرف القلب المجروح ما عليهـش ستـار

و عيون تسبل فوق الخـد دي جـد ف جـد
و عمرهـا مـا تكلـم حـد عيـون أحـرار

و عيون تحقق فيها بشوق تهرب على فـوق
بتقوللك ابعـد عنـي بـذوق نظراتـك نـار

و عيـون مـا تعـرف زعلانـة أو فرحانـة
صباح مسا أهـي سهتانـة صاحبـة أفكـار

و عيون لها ضحكة ف وشـك بـس تغشـك
و تبص من تحـت اليشمـك تلقـى المنقـار

و عيون كدا يبقم ساهتين صفـر و باهتيـن
بالشكل دا عيون الخاينيـن تضـرب بصفـار

و عيون تبـص و تتسفلـق واقفـه شلقلـق
و عيون تبربق و تبحلـق عايزيـن مسمـار




مما راق لى
للزجال بيرم التونسي