كيف تجعل نقدك ، نقدا بناء ومتميزا ؟!

فى الأول كنت عاوز أقول قصة ،
هيه قصة بنت بتقول أن جيرانهم كانوا بيسيبو القمامة قدام البيت،
وما بيرموهاش فى المكان المعروف لتجميع القمامة فقدمولهم النصيحة بأن شكلها
مش كويس ، وبرضه مفيش فايدة فقالو أنه لو انتقدوهم يبقى بيزودو المشكلة و
ما حلوش حاجة فبقو يا خدو القمامة بتاعتهم كل يوم ويرموها مع بتاعتهم
ومرة ورا مرة جيرانهم دول حسو بالخجل فبقو يرمو القمامة بتاعتهم بنفسهم ..

من القصة نلاقى أنه فيه نوعين من النقد :
اما أننا نحاول نصحح الخطأ اللى قدامنا وده طبعا نقد بناء ومطلوب
أو أننا نعيب ونجرح فى اللى قدامنا بدون الوصول الى أى نتيجة
وده غير مطلوب أبدا بل بالعكس هوه مذموم ،

لكن دلوقتى ازاى تخلى نقدك ومشاركتك دايما من النوع الأول البناء :

1-الإخلاص : يعنى تكون نيتك دايما خالصة لله عز وجل لا يكون تنقد لهوى ولا لحسد ولا لسوء ظن ولا لغرض دنيوي، وإنما تنقد لتقديم النصحية

يقول الرسول صلى الله عليه وسلم " الدين النصيحة ، قلنا : لمن يارسول الله

قال : لله ولكتابه ولرسوله ولأئمة المسلمين وعامتهم " رواه البخارى ومسلم


2- حاول دائما أن تجعل نقدك غير مباشر

زى " مال بال أقوام " أو كما يقول ربنا سبحانه وتعالى فى القرآن " منهم " "ومنهم " ولم يذكر أسماء .


3-الإنصاف والعدل:يعنى ما ينفعش أدى الأمور أكبر من حجمها .



3- محاولة علاج الخطأ اللى بذكره بقدر الإمكان

أحاول أركز على الحلول أكثر من التركيز على الخطأ نفسه ،

وأنا شخصيا ساعات بقع فى النقطة دى بالذات ،

يعنى نحاول على أدما نقدر نقترح لحل المشكلة ..


4-تضع في ذهنك أنه لا يوجد أحد إلا ويخطئ، كل ابن آدم خطاء،

وهذا سيبعدك تماما ان شاء الله عن القسوة فى النقد ،

لأنك هتحس أن كل واحد وله يوم !!


5- أن أنت تخلى نقدك دايما أدعى للقبول يعنى تحاول تستخدم الوقت المناسب والأسلوب المناسب ودى بقى مهمة جدا وطبعا نذكر فى دى

المثال المعروف باسم

" البسكوتة المحشية " أو " الساندوتش "

زى مثلا لو هتعرض على نقطة معينة فى أحد المواضيع تبدأ

بذكر الإيجابيات فى الموضوع

وبعدين تقول النقطة اللى أنت معترض عليها

وطبعا ما تختمش بيها كلامك ولكن تقول مثلا

" لكن جزاكم الله خيرا فعلا موضوع مهم جدا

ومبذول فيه جهد طيب " ده مثلا ..



6- أننا نحسن الظن دايما ونلتمس الأعذار لغيرنا

وقد قال الله تعالى: (( يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ ))(سورة الحجرات: 12



7-البعد تماما عن السخرية أو ايذاء كاتب الموضوع

" المسلم أخُوْ المُسْلِمِ لا يَظْلِمُهُ ولا يَحْقِرُهُ ولا يَخْذُلُهُ " رواه مسلم

زى مثلا واحد اقترح اقتراح وما عجبش الناس تلاقى التعليقات

يا بيضة ويا حلوة وغيره من أساليب السخرية من صاحب الإقتراح

بعيدا عن أن أنا شخصيا ما كنتش موافق على الإقتراح

بس كل واحد من حقه يقترح و طبعا كل واحد

من حقه أنه يعترض لكن بأسلوب مهذب

لازم تعرف كويس أن " أن حريتك تنتهى عند بداية حرية الآخرين "


8-البعد تماما عن تتبع أخطاء الآخرين وكثرة النقد

" كثرة النقد تولد السخط "

يعنى مش بننقد عمال على بطال

نحاول نفوت ونخف شوية زى ما بيقولو ..


دى كانت شوية اقتراحات كده على أدى ،

يعنى فى رأيى المتواضع ،

لو وجدت فى الناقد هيبقى من السهل على الطرف الآخر أنه يتقبل النقد

أو النصيحة لأن طبيعى أن النفس البشرية

لا تقبل النقد أبدا ولكن على الموجه له النقد التأسى

بالسلف الصالح كانوا بس مش بيقبلو النقد ،لا ده كمان

كانوا بيفرحوا بيه وطبعا خير مثال سيدنا عمر وهوه أمير المؤمنين

يقول له رجل اتق الله و يكررها

فقال للرجل قائل: اسكت فقد أكثرت على أمير المؤمنين، فقال عمر: دعه لا خير فيهم إن لم يقولوها، ولا خير فينا إن لم نقبلها.

وقال رجل لمعاوية: والله لتستقيمن بنا يا معاوية، أو لنقومنك، فقال معاوية: بماذا، قال: بالخشب، فقال معاوية: إذن نستقيم، وغيرها من القصص ..

أخيرا جزاكم الله خيرا
على فكرة ده أول موضوع ليا
فى انتظار المشاركات والنقد بصدر رحب ان شاء الله

الأخ مصطفى الأبنودى والأخ عبد الله

جزاكم الله خيرا عالمشاركة الطيبة ،

أما بالنسبة لموضوع الدمج فأنا ما كنتش أعرف بجد ،

ولكن متعوضة المرة القادمة باذن الله تعالى ..